100 vjetori i Pavarësisë, Berisha vizitë në Gjakovë e Decan
Kryeministri Sali Berisha do të zhvillojë të premten një vizitë në Gjakovë dhe në Deçan ( Kosovë). Kjo vizitë bëhet në kuadër të kremtimeve të 100 vjetorit të Pavarësisë së Shqipërisë, organizuar në të gjitha trevat shqiptare. Berisha sëbashku me autoritetet më të larta të Kosovës do të jetë i pranishëm në ceremonitë e vendosjes së shtatoreve të patriotëve shqiptarë në Gjakovë dhe Deçan.
Fillimisht, Kryeministri do të ndalet në komunën e Gjakovës, ku në prani të Presidentes së Republikës së Kosovës, Atifete Jahjaga, dhe autoritete vendore do të zhvillohet ceremonia e zbulimit të shtatores së patriotit Ali Ibra, në qendër të këtij qyteti.
Më pas, Berisha do të vizitojë Deçanin. Kryeministri do të nderojë kujtimin e luftëtarëve të UÇK-së në memorialin kushtuar UÇK-së, në Gllogjan, do të bëjë një vizite në familjen Haradinaj, si dhe do të vendosë buqeta me lule edhe pranë shtatoreve të heronjve Luan Haradinaj dhe Sali Çeku.
Në një ceremoni të veçantë, Berisha do nderohet me titullin “Qytetar Nderi” i Deçanit, dhënë nga këshilli komunal. Në këtë ceremoni do të jetë i pranishëm edhe Kryeministri i Republikës së Kosovës, Hashim Thaçi.
Më pas, Berisha dhe Thaçi do të vazhdojnë në fshatin Isniq të Deçanit, ku do të jenë të pranishëm në ceremoninë e zbulimit të shtatores së heroit Isa Boletini. Në këto vizita, Berisha do t’i drejtohet me një fjalë qytetarëve të Gjakovës dhe Deçanit, ku do të shprehë ndjenjën e krenarisë dhe përuljes, në këtë 100 vjetor të pavarësisë së Shqipërisë, para kontributit të shquar she sakrificave të të gjithë patriotëve shqiptarë, kudo, në ngjarjen më të madhe të historisë moderne shqiptare.
