Meta vlerëson Panaritin për vizitën në Greqi: Krijoi një stad të ri në marrëdhëniet mes dy vendeve
Kreu i LSI-se, Ilir Meta
“Vlerësoj faktin që gjatë kësaj vizite janë diskutuar të gjitha çështjet që konsiderohen të vështira dhe të mbartura nga e kaluara, por edhe çështjet që kanë të bëjnë për progresin e marrëdhënieve mes dy vendeve dhe kujdesin ndaj qytetarëve në mënyrë të veçantë për pengesat në fushën e transportit dhe të patentave”, tha Meta.
Në lidhje me çështjen aq shumë të debatueshme të kufirit detar me Greqinë, Meta gjithashtu vlerësoi qëndrimin e mbajtur nga kreu i diplomacisë shqiptare duke e konsideruar atë si parimor dhe transparent.
Kreu i LSI-së vlerësoi edhe bisedimet për zgjidhjen e çështjes çame dhe pronave të shqiptarëve në Greqi, duke theksuar se të gjitha përpjekjet e bëra janë një hap i rëndësishëm për të vlerësuar në mënyrë më parimore marrëdhëniet mes dy vendeve.
Meta ka theksuar më tej se Greqia është e angazhuar për të mbështetur integrimin e Shqipërisë dhe sipas tij kjo tregon vullnetin e të dyja palëve për t`i shërbyer marrëdhënieve mes të dyja vendeve por edhe konsolidimit për një të ardhme europiane.
I pyetur në lidhje me incidentin me flamurin shqiptar në Greqi, kreu i LSI-së Meta theksoi se ajo që ndodhi nuk ka qënë diçka e organizuar dhe fakti që shteti grek ka kërkuar 3 herë falje tregon se kemi një sukses të diplomacisë shqiptare dhe një vullnet për të parë rezultatet positive të kësaj vizite.
