Rama-Berishës: Jam pa imunitet, vërteto qoftë edhe një akuzë që ke hedhur ndaj meje
Kryetari i Partisë Socialiste, Edi Rama, ka ftuar publikisht Kryeministrin Sali Berisha që të vërtetojë qoftë edhe një akuzë të vetme që ka bërë ndaj tij. Në këtë mënyrë, Rama i është përgjigjur përmes postimeve në rrjetin social Twitter të akuzave të njëpasnjëshme që i janë bërë nga Partia Demokratike në lidhje me bllokimin e heqjes së imunitetit. “Asnjë prove nuk ka KM as për tërë atë lumë akuzash ndaj deputeteve të PS që vijne nga bota e sipërmarrjes! Imuniteti s’ka lidhje në këtë mes”, thekson Rama në një prej komenteve. Në vijim ai thekson se “asnjë vend normal s’do e pranonte një ditë të vetme për KM një shpifes që cdo ditë ngre akuza në hava ndaj opozitës e s’vërteton dot asnjë!”. Në këtë kuadër, Rama ka ftuar Berishën që të vërtetojë qoftë edhe një akuzë të hedhur ndaj tij. “Vazhdon tallja me shqiptarët!Një propozim publik për KM: Ja ku jam unë pa imunitet, vërteto një akuzë të vetme në mijëra që ke bërë ndaj meje!”, thekson Rama.
