Felaj: Nishani i plotësoi ëndrrën Berishës për të kontrolluar SHISH
Partia Socialiste reagoi sot ashpër ndaj Presidentit Bujar Nishani, në lidhje me dekretin për shkarkimin e Drejtorit të Përgjithshëm të SHISH, Bahri Shaqiri. “Bujar Nishani vuri njeriun e Gazidedes në krye të SHISH, ai e di mirë pse Saliu do ta ketë në dorë SHISH. Nishani na ktheu pas në kohë. Berisha e shërbëtori i tij nuk pyesin për askënd, nuk këshillohen as me aleatin tonë më të madh, SHBA”, tha deputetja Ermonela Felaj përmes një deklarate për mediat. Duke e cilësuar largimin e Shaqirit si plotësimin e ëndrrës së Kryeministrit për të pasur në kontroll SHISH, Felaj tha se “Bujar Nishani na kthehu pas në kohë duke e vendosur Shërbimin Informativ Shtetëror në duart e Berishës, duke vënë në krye të tij ish punonjësin e Gazidedes. Këtë veprim ai e bëri pa mëdyshjen më të vogël, duke vënë në duart e pushtetit Shërbimin Informativ Shtetëror”.
Deputetja Felaj shtoi më tej se në një kohë që Shërbimi Informativ Shtetëror ishte kthyer në partner ndërkombëtar, Kryeministri dhe shërbëtori i tij Bujar Nishani e kthehu SHISH në kontrollin e Qeverisë. Sipas Felaj, vendimi i përbashkët mes Kryeministrit dhe Presidentit u mor pa pyetur askënd, madje duke mos denjuar as të këshillohen edhe me aleatin më të madh të vendit, Shtetet e Bashkuara të Amerikës.
Felaj apeloi që qytetarët ti bashkohen opozitës, për ti dhënë fund sipas saj, drejtësisë së gjunjëzuar para pushtetit.
