Imuniteti, PS kundër referendumit. Xhafaj: Mbështesim Berishën po pranoi kushtet tona
Partia Socialiste u shpreh kundër mbajtjes së një referendum popullor vetëm për cështjen e imunitetit, ndërsa kushtëzoi mbështetjen e saj që në referendum të përfshihen edhe reforma në drejtësi, ndalimi i importit të plehrave dhe marrëveshja e detit, në të cilën përcaktohet kufiri detar mes Shqipërisë e Greqisë. Nënkryetari i Komisionit parlamentar të Ligjeve, deputeti i PS-së, Fatmir Xhafaj, e cilësoi si një teke të Kryeministrit kërkesën për referendum popullor në lidhje me cështjen e imunitetit.
“Të gjithë e kanë të freskët sjelljen e ushtarit të Kryeministrit, kamikazit Ristan, për kryerjen e referendumit për importin e plehrave, e mbështetur nga shoqëria civile dhe partnerët ndërkombëtarë. Referendumi është hedhur si alternativë edhe nga PS në rast të mungesës së amendamenteve që trajtojmë. Ai thotë se miratimi i amendamenteve në shtator është i vonuar, por ku shkoi kjo kauzë kur thotë për referendumin që kushedi kur bëhet. Kryeministri kërkon 2/3 e votave për amendamentet kushtetuese në referendum. Partia Socialiste është dakord për mbajtjen e referendumit dhe i jep votat nëse në referendum përfshihen 4 çështje:Heqja e imunitetit;Reforma në Drejtësi;Ndalimi i importit të plehrave;Ndalimi i marrëveshjes për cenimin e kufijve detarë në Shqipëri”, tha Xhafaj.
Ndërkohë seancën e djeshme në Kuvend, deputeti socialist e cilësoi një seance shterpë, të dështuar si dhe të provokuar e imponuar nga Kryeministri Berisha. Në këtë kontekst ai u shpreh se opozita debatoi me argumente dhe fakte me qëllimin e vetëm reflektimin e përbashkët në funksion të klimës së bashkëpunimit dhe konsensusit, por Kryeministri dhe Qeveria zgjodhën rrugën e forcës.
“Berisha në funksion të strategjisë për të larguar vëmendjen e qytetarëve nga hallet, provoi një debat shterpë për një çështje që nuk ishte çështje. Kuvendi u përdor nga shumica. Mosvotimi i djeshëm e la të hapur shansin që në përfundim të debatit amendimet të votohen si pjesë e një projekti të përbashkët edhe ato për kufizimin e imunitetit. Grupi ynë parlamentar e ka bërë të qartë pozicionin e tij pro amendamenteve që kufizojnë imunitetin e ministrave, deputetëve dhe zyrtarëve, gjithë të tjera janë spekulime politike që nuk kanë pse meritojnë vëmendjen tonë”, theksoi ai.
